“Hy laat immers sy son opkom oor slegtes en goeies, en Hy laat reën oor dié wat reg doen en dié wat verkeerd doen” (Matteus 5:45).
In Matteus is daar ʼn dieper rede waarom ons as God se kinders geroep word om die pad te loop waarop ons ons vyande leer liefkry.
Dié rede is dat God sy son van goedheid oor alle mense, goeies en slegtes, laat skyn. Ook laat God sy reën van genade uitsak oor hulle wat reg doen en hulle wat verkeerd doen.
Behalwe dat dit beteken ons moet versigtig wees om mense, wie hulle ook al is, die goedheid en guns van God te misgun, beteken dit ook iets anders. Dit is dat God lank reeds met ander mense besig is op maniere wat ons nooit sal kan peil of raai nie.
Presies dié wete moet ons motiveer om elke dag op die uitkyk te wees vir God se sonkolle in ander se lewe, soos ons dit kan noem, selfs al is hulle ons vyand.
Iemand het hierdie wonderlike waarheid só verwoord: “Wie ander benader, maak nie saak wie hulle is nie, moet altyd weet hulle betree heilige grond. Want lank voordat jy besluit het om daarheen te gaan, was God al daar.”
Die paaie na ons vyand se lewe is inderdaad reeds oopgestel en vindbaar. Ons moet dit net gaan soek en vind.
Here, dat U U oor almal ontferm, is vir ons meestal te swaar om te begryp. Hoe kan U misdadigers, verkragters en moordenaars verduur? Help ons vandag om bokant ons woede uit te styg en die weg van deernis, begrip en liefde ook na hierdie mense te vind. Amen.
Carel Anthonissen
