God wat gesê het: “Laat daar lig skyn uit die duisternis,” het ook in ons harte ʼn lig laat skyn om ons te verlig met die kennis van die heerlikheid van God, wat van Jesus Christus uitstraal (2 Korintiërs 4:6).
Onlangs lees ek hierdie pragtige opmerking van ʼn ou monnik.
“Nothing is more beautiful than a face made transparent by a whole lifetime of sorrows and joys, of combats and of inner peace.”
Ek is seker julle het al sulke gesigte in julle lewe gesien – ouer gesigte wat steeds straal met die lig van kalmte en wysheid. ʼn Wysheid wat gevorm is deur die spreekwoordelike vuur.
Dit is daardie oomblikke van aanvegting en teleurstelling wat jou geloof tot die uiterste toe kan beproef. Maar waarin jy ook, dikwels ná lang nagte van vertwyfeling en wroeging, tot groter geduld, aanvaarding en veral liefde kon kom. ʼn Wysheid waarin jy, soos Paulus, geleer het dat God se genade genoeg is. En dat jy daarin kan rus.
ʼn Lewe wat só deur God se genade gevorm is, staan ook bekend as ʼn gerypte lewe.
Dit is ʼn lewe waardeur die lig van God se genade elke dag skyn. Só skyn dat mense dit op ons gesigte kan sien.
Here, dankie vir u genade wat oor ons skyn. Help my om so daarna te draai dat dit ook op my gesig sigbaar sal wees. Amen.
Carel Anthonissen
