By U Here, skuil ek. Laat my tog nooit teleurgestel staan nie! (Psalm 31:2).

Inderdaad is dít die groot vraag waarmee Psalm 31 ons konfronteer: Wat maak ek met lyding en terugslae wanneer dit my pad kruis? Hoe reageer ek daarop?

Let wel, die vraag is nie soseer nie: Waar kom die ellende vandaan? Of: Waarom het dit mý getref? Dit is eerder: Waarheen lei dit my vandag? Kan ek miskien iets daaruit leer?

Neem lyding my dieper die donkerte in? Versterk dit my gewoonte om te kla? Laat dit my in groter sinisme verval, nog meer bitter word, ander blameer? Of open dit ʼn deur tot iets groter, iets beter, iets meer?

In die psalmdigter se geval dryf dit hom tot in God se arms. Dit laat hom weer by God gaan skuil. Dit bring hom tot nuwe oorgawe, dringender gebed, sterker vertroue. Luister net: “By U, Here, skuil ek” (v 2). “In u hande gee ek my lewe oor” (v 6). “Maar ek vertrou op U, Here” (v 15).

Wat ʼn genade as jy, te midde van jou ellende, dít kan sê. Dit óók kan begin doen.

Here, hoe maklik val ons vas in ons sorge. Hoe traag is ons om U te vertrou. Wek ons vandag opnuut op om by U te skuil. Amen.

Carel Anthonissen