Boodskap vir Vandag

Search
Close this search box.
Search

ʼn Vraag om mee besig te raak

Toe vra Hy vir my: “Mens, kan daar in hierdie bene weer lewe kom?” (Esegiël 37:3).

Esegiël 37:1-14 verkondig die boodskap van Paasfees op ʼn beeldryke manier. Terselfdertyd adem dit die gees van Pinkster.

Dié gedeelte open met ʼn somber toneel.

Die profeet bevind hom in ʼn dodeakker vol geraamtes. Dit is die beeld van ʼn volk wie se sondes hulle ingehaal het, wat nou die wrang vrugte van hulle vele onregte, korrupsie en onverskilligheid pluk – ʼn gevange nasie (captured nation) wat hulle identiteit en roeping verloor het.

Erger nog, dit is ʼn volk wat innerlik verlam is. Wat wonder of daar nog ʼn toekoms is. ʼn Volk wat magteloos en wanhopig kla: “Ons bene is uitgedroog, ons het geen hoop meer nie, dit is klaar met ons” (v 11).

In hierdie omstandighede stel God dié geweldige vraag aan die profeet: “Mens, kan daar in hierdie bene weer lewe kom?” Of anders gestel: “Dink jy daar is ʼn kans op herstel?”

Herken jy dié vraag? Sien jy dat dit die vraag na geloof is? Die vraag of ek en jy nog enigsins vertrou dat wonderwerke kan gebeur. Dat God nuwe lewe kan gee waar daar nou net doodsbeendere en grafte is. In ons land, in jou lewe.

Die tyd ná Paasfees daag ons uit om weer biddend met dié vraag besig te raak.

Here, hoe klein is ons geloof tog. Kom, Here. Help ons om U al meer te vertrou, om te glo dat U ons grafte kan oopmaak. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.