Maar die wysheid wat van Bo kom, is allereers sonder bybedoelings, en verder is dit vredeliewend, inskiklik, bedagsaam, vol medelye en goeie vrugte, onpartydig, opreg (Jakobus 3:17).

Jakobus is ʼn wysheidsboek. En in hoofstuk 3 fokus Jakobus op wysheid en dwaasheid, net soos ons dit in die boek Spreuke vind.

Jakobus sê die wysheid van bo is suiwer, maar dit is ook vredeliewend, bedagsaam, inskiklik, vol deernis en goeie vrugte, onpartydig en ongeveins.

En dan sê Jakobus iets wat ons so maklik vergeet. Hy sê dit is dwaas, eintlik ʼn bietjie simpel, om vir iemand wat ons sien honger ly te gaan sê: “Gaan in vrede, word warm en word versadig,” maar ons self gee nie vir hulle wat hulle in hulle nood nodig het nie (Jak 2:16).

Miskien is dit dan wyser om eerder nie te bid vir mense wat in die winter koud kry nie, in plaas daarvan om te bid en te dink die komberse gaan uit die hemel val.

Nee, wanneer jy bid, moet jy ook luister en doen. Want miskien is die komberse in jou kas.

Here, help my onthou om die kos en kombers uit my kas te gee saam met die woorde: “Gaan in vrede, word warm en versadig.” Amen.

Lisel Joubert