“Kom, almal wat dors is, kom na die water toe, selfs ook dié wat nie geld het nie, kom, koop en eet” (Jesaja 55:1).
In Jesaja 55 roep God almal om te kom eet en drink. Alles is verniet. Almal kan kom, selfs dié wat nie geld het nie.
Ons leef in ʼn skeptiese tyd. Mense sê: “There is nothing like a free lunch.” Alles het die een of ander fyndruk-voorwaardes wat jy te laat ontdek.
Hier in Jesaja word die Israeliete in ballingskap na ʼn fees genooi. Babilonië gun hulle nie hulle bestaan nie, maar God wil vir hulle lewe skenk. Later in die teks sien ons God gee vir hulle meer as net die basiese dinge soos water; Hy gee ook vir hulle wyn en melk.
Wat wil Hy in ruil hê? Waarskynlik wat ons wil hê van iemand vir wie ons regtig lief is – hulle blote teenwoordigheid.
Jesus het ook ʼn storie oor ʼn fees vertel. Dié wat genooi is, het dadelik verskonings gehad. Toe stuur Hy sy dissipels na die “heggies en steggies” (sê ʼn Nederlandse vertaling). Na dié mense wat ʼn fees sal herken vir wat dit is: ʼn fees. En dit boonop verniet.
Wanneer God ons nooi, kan ons gerus die voorbehoude in ons hart so ʼn bietjie los en spontaan gaan eet en drink en feesvier.
Ek antwoord ja op u uitnodiging, Here. Ek kom eet en drink en vier fees in u teenwoordigheid. Amen.
Lisel Joubert
