Toe het Hy ingegaan om by hulle oor te bly. Terwyl Hy saam met hulle aan tafel was, neem Hy die brood, vra die seën, breek dit en gee dit vir hulle (Lukas 24:29-30).
Velázquez (1599-1660), ʼn Spaanse digter, het in sy leeftyd ʼn aangrypende skildery van Jesus se besoek by die Emmausgangers gemaak.
Denise Levertov, ʼn digteres, sou later ook ʼn roerende gedig hieroor skryf.
Die skildery beeld ʼn diensmeisie van Moorse afkoms uit wat, terwyl die mans in die voorkamer vergader, ʼn maaltyd met iets te drinke vir hulle voorberei.
Velázquez wys hoe sy, terwyl sy werk, deur die oop venster agter haar die gesprek tussen die mans afluister. Op aangrypende wyse vang die Spaanse meester dan die oomblik vas wanneer die diensmeisie, terwyl haar kop skuins na agter gedraai is, Jesus herken. En dit nog voordat die ander dit besef.
Die impak van die ontdekking dat die gestorwe Jesus lééf, is so geweldig dat die keramiekbeker op daardie oomblik uit haar hand val en volkome verstomming haar gesig verhelder.
Behalwe dat hierdie skildery die verrassing van Jesus se opstanding uit die dood vanuit ʼn onverwagse hoek uitbeeld, herinner dit ons dat die opgestane Jesus se genade en liefde ook vreemdelinge bereik. Ook dat ons Hom in die mees alledaagse aktiwiteite en ruimtes van ons lewe kan ontmoet.
In Teresa van Ávila se woorde: “God is found in the pots.”
Here, wat ʼn troos is dit om vandag weer te weet dat U nooit ver is nie, maar naby. Selfs daar waar ons in die kombuis werk, ontmoet U ons. Maak ons oë vandag weer daarvoor oop. Amen.
Carel Anthonissen
