Dié God is ons God vir altyd; Hy sal ons altyd lei (Psalm 48:5).

Die tyd ná Pinkster tot en met Advent staan in Engels as ordinary time bekend. Ons noem dit Koninkrykstyd. Ordinary time klink dalk vreemd – so na gewone of alledaagse tyd.

Wat dit eintlik beteken, is dat ons tydens die groot feesdae soos Kersfees, Lydenstyd, Paastyd en Pinkster stilgestaan het by hoe God Drie-enig Hom in Jesus aan ons openbaar. Dit is die groot oomblikke in die Christus-verhaal. In hierdie gewone tyd, oftewel Koninkrykstyd, bedink ons die implikasies van die groot verhaal vir ons kerkwees, menswees, gemeenskappe en individue. Die implikasies vir elke dag se klein verhale.

Iemand het tereg opgemerk dat die meeste van ons dae in elk geval alledaags is. Nie vol krisisse of tragedies of groot gebeure nie, maar die lewe, dag vir dag. Dit is juis in die alledaagse lewe dat Jesus se verhaal en ons verhaal integreer, waar die groot storie die klein storie in kerkwees, vriendskappe, diens en roeping raak.

Alledaags is tog altyd heilig, want God se verhaal het op aarde tussen ons afgespeel.

Here, dankie dat U my God is, in ordinary time én in extraordinary time. Amen.

Lisel Joubert