Jesus het gehuil (Johannes 11:35).

In Johannes 11 kry ons die intens emosionele gebeurtenis van ʼn familielid en vriend wat sterf. Lasarus en sy twee susters, Marta en Maria, was Jesus se goeie vriende. Toe Lasarus siek word, stuur die susters vir Jesus ʼn boodskap: “Here, hy vir wie U lief is, is siek” (11:3). Jesus kom egter te laat en albei susters verwyt Hom omdat hulle glo hulle broer sou nog geleef het as Jesus vroeër gekom het.

Die susters en omstanders se emosies maak dat Jesus ook begin huil en as’t ware ontsteld teenoor die dood voor die graf staan. Volgens die New Revised Standard Version was Jesus “greatly disturbed in spirit and deeply moved” (11:33). Die dood het sy vriend gevat.

Die eerste lesers sou sekerlik geskok gewees het oor ʼn God wat huil! Dit hang egter af wat ons as mag beskou. Deernis en liefde is ook mag. Die Jesus wat huil, het ook geroep: “Lasarus, kom uit!” (11:43).

Lasarus was Jesus se vriend. Ons het gehoor ons is ook sy vriende. Miskien hoor ons dan nou dié woorde anders: “Niemand het groter liefde as dit nie: dat hy sy lewe vir sy vriende aflê” (15:13). Dit is ʼn anderster soort mag – ʼn verlossende mag.

Dankie, Here Jesus, dat U my met so ʼn groot liefde liefhet dat U u lewe vir my afgelê het. Amen.

Lisel Joubert