Toe Hy uitklim, het Hy die groot skare gesien, hulle innig jammer gekry en hulle siekes gesond gemaak” (Matteus 14:14).

Barmhartigheid het ook te make met “jammer kry”. Nie jammer kry op ʼn negatiewe manier wat verkleinerend kan klink nie, maar jammerte as ʼn diep deernis.

Op meer as een plek in die Bybel lees ons Jesus het mense versorg omdat Hy hulle jammer gekry het. Een voorbeeld is Matteus 14:14: “Toe Hy uitklim, het Hy die groot skare gesien, hulle innig jammer gekry en hulle siekes gesond gemaak.” En in Lukas 6:36 lees ons: “Julle moet barmhartig wees soos julle Vader barmhartig is.”

Die gelykenis wat hierdie woorde verduidelik, vind ons in Matteus 18. Die koning het die slaaf wat hom baie geld geskuld het, laat roep. Dié het voor hom neergeval en uitstel gevra. “Die heer van daardie slaaf het hom innig jammer gekry, hom vrygelaat en sy skuld vir hom kwytgeskeld” (v 27). Dieselfde slaaf het buitentoe gestap en ʼn ander slaaf wat hom geld geskuld het, aangeval. Hy het nie sy medeslaaf jammer gekry nie. Hy het dit nie reggekry om die deernis wat hy ontvang het uit te deel nie. Hy het gesukkel om barmhartig te wees soos die Vader barmhartig is.

Leer my om met meer barmhartigheid en deernis te leef, Here, sodat ek al hoe meer soos U kan word. Amen.

Lisel Joubert