Bly weg van die kwaad af en doen wat goed is, soek vrede en jaag dit na (Psalm 34:15).

Aan die begin van Augustus het ek die voorreg gehad om saam met vyftien ander Suid-Afrikaners ʼn pelgrimstog in Denemarke te onderneem.

Hoewel klein, is Denemarke in vele opsigte ʼn unieke samelewing.

Behalwe dat hierdie Skandinawiese land tegnologies en ekonomies hoogs ontwikkeld en welvarend is, staan dit ook bekend as die land met die minste misdaad ter wêreld. Vir albei dié kenmerke is daar ʼn bepaalde rede: sosiale vertroue.

Sosiale vertroue, só skryf die Deen Gert Svendsen, is die grondstof, die verborge goud, wat hulle ekonomie bly stimuleer en die meerderheid Dene gelukkig hou. In Svendsen se woorde:

“The Dane’s trust is a unique resource for businesses and citizens. Danish businesses are known for their ability to cooperate without comprehensive and expensive formal contracts. They often reach oral agreements and thereby reap the additional bonus of avoiding misunderstandings, because of oral and trustful communication.”

As daar een iets is wat ons as kerk en gelowiges in Suid-Afrika aan ʼn volgende geslag verskuldig is, is dit hierdie verborge goud van Denemarke. Dit is om die boustene te lê vir ’n samelewing waarin sosiale vertroue, dit wil sê, vertroue teenoor ander en veral teenoor ons publieke instellings, sal floreer.

Is dit nie ook die geheim van die vrede waarna ons almal so smag nie?

Here, gee ons vandag meer vertroue in U en in mekaar. Sodat die vrede van die stad sal floreer. Amen.

Carel Anthonissen