“Dit verseker Ek julle: Vir sover julle dit aan een van die geringste van hierdie broers van My gedoen het, het julle dit aan My gedoen” (Matteus 24:40).
Die gevaar van liefde is sentimentaliteit; liefde op ʼn afstand; ʼn warm gevoel. Die Ou Testament se refrein van reg en geregtigheid laat ons liefde werklik verstaan. Liefde is die herstel van onreg, die soeke na God se wil en dit is konkreet: Gee kos, gee klere, besoek dié in die tronk (Matt 25).
In Jesaja 5:7 motiveer God sy hartseer en teleurstelling oor sy volk, sy wingerd: “Die Here het verwag dat daar reg sou wees, maar daar was net onreg, dat daar geregtigheid sou wees, maar daar was net die hulpgeroep van die verontregtes.”
Simone Weil het geskryf: “The Gospel makes no distinction between the love of our neighbour and justice.” Liefde is dan eintlik aktivisties. Dit vee nie onder die mat in nie, bly nie stil om die vrede te bewaar nie. Die liefde stir die hele tyd, want ons is nie tevrede met ʼn wêreld vol onreg nie. Ons bid tog dat God se wil sal geskied, en dit gebeur wanneer daar reg en geregtigheid is.
Weil meen: “We invented the distinction between justice and charity.” Om kos en klere te gee is tog minder gevaarlik as om ons teen onreg en die herstel van ongeregtigheid uit te spreek.
Here, maak my ore oop om die hulpgeroep van die verontregtes te hoor en die moed om te help. Amen.
Lisel Joubert
