As ek darem nie geglo het dat ek die goedheid van die Here sal sien in die land van die lewendes nie … (Psalm 27:13).

Die “as” waarmee Psalm 27:13 begin, spreek boekdele.

“As ek darem nie geglo het … nie.”

Hierdie “as” dui daarop dat die psalmdigter ʼn ander scenario geken het en erken. ʼn Scenario waarin hoop en vertroue nie bestaan nie. Waarin daar nie ʼn groter prent is om aan vas te hou nie.

Waarin daar geen verwagting is om die goedheid van God te proe nie.

Die digter verstaan dit is net omdat daar ʼn verwagting is dat wag moontlik is. Wag is ʼn integrale deel van ons geloof. Dit is die bymekaarkom van ons verwagtings, planne en idees en God se tyd.

Dit is die oorvleueling van ons sien en God se sien:

“Wag op die Here! Wees sterk en hou moed, ja, wag op die Here!” (Ps 27:13-14).

Help my om te wag en te bly glo, Here, al sien ek nog niks nie, al sukkel ek om te vertrou en te hoop. Amen.

Lisel Joubert