Die Woord het mens geword en onder ons kom woon. Ons het sy heerlikheid gesien, die heerlikheid wat Hy as die enigste Seun van die Vader het, vol genade en waarheid (Johannes 1:14).
Vir my is een van die mooiste verhale om die menswording van Jesus te verduidelik die verhaal van Thomas Merton.
Merton was ʼn monnik in ʼn baie streng Katolieke orde. Later in sy lewe het hy bely dat hy gedink het hy is darem ʼn bietjie beter as gewone mense. Hy het immers baie dinge opgeoffer en volgens ʼn baie streng roetine geleef.
Eendag het Merton egter ʼn ervaring beleef wat sy manier van dink heeltemal verander het. Hy was in ʼn besige stad omring van mense. Hy skryf:
“In Louisville, at the corner of Fourth and Walnut, in the center of the shopping district, I was suddenly overwhelmed with the realization that I love all those people, that they were mine and I theirs, that we could not be alien to another even though we were total strangers.”
Die implikasie van God se menswording het tot hom deurgedring: God het ons menswees kom bevestig.
U het mens geword en onder ons kom woon, Here Jesus, en só kom bevestig dat ons mense is, u mense. Amen.
Lisel Joubert
