Boodskap vir Vandag

Search
Close this search box.
Search

Mense wat seën

Inteendeel, wees mense wat seën, omdat julle daartoe geroep is, sodat julle seën as ʼn erfdeel kan verkry (1 Petrus 3:9, Direkte Vertaling).

Dit spreek tog vanself dat dié wat deur God geseën word, dit ook aan ander sal gun en hulle seën met ander sal deel.

Ook al verdien die ander dit nie; selfs al kry dié wat die seën uitdeel geen erkenning daarvoor nie.

Is dit dan nie waarop Petrus sinspeel wanneer hy in sy eerste brief die gelowiges in Klein-Asië, wat erg onder vervolging deurgeloop het, vermaan nie: “Moenie kwaad met kwaad vergeld of skeldtaal met skeldtaal nie; maar, inteendeel, wees mense wat seën omdat julle daartoe geroep is” (1 Petrus 3:9).

Om ander wat jou te na kom of selfs vervolg te seën, is natuurlik nie altyd so maklik nie. Dit vra dat ons, soos Christus, eerstens dieper sal probeer inkyk in die lewe van ander en beter sal begryp waarom hulle is soos hulle is. Kortom, dit vra dat ons ons harte teenoor hulle sal oopmaak.

Wie dit doen, sal ontdek dat hulle mettertyd die krag ontvang om die ander, selfs hulle vyande, te seën. Hoe pragtig stel John O’Donohue dit: “Wherever one person takes another into the care of their heart they have the power to bless.”

Meer nog, sê Petrus, is dat ons op dié manier – deur ander te seën – die weg vir God oopmaak om ons nóg meer te seën.

Here, maak tog ons harte vandag oop teenoor ander, ook ons vyande, sodat ons woorde en dade vir hulle tot seën kan wees. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.