Waak dan omdat julle nie weet op watter dag en uur dit sal gebeur nie (Matteus 25:13).
Die gelykenis van die tien meisies in Matteus 25:1-13 bevat ʼn belangrike waarheid.
Dit is dat die groot bedreiging vir ʼn samelewing se stabiliteit en oorlewing nie altyd in slegte omstandighede – in dinge soos ekonomiese verval, korrupsie of misdaad – geleë is nie.
Hoewel dit bydraende faktore is, is daar ook ʼn ander, selfs groter gevaar.
Dit is dat gelowiges in só ʼn tyd van onsekerheid nie waaksaam en gereed genoeg is nie. Nie in staat is om die tekens van die tye te lees nie. En daarom nie weet dat God steeds in en deur die onrus aan die werk is en sy koninkryk laat kom nie. En dat God nou, meer as ooit vantevore, van sy volgelinge verwag om op hulle pos te wees. Om met oop oë te leef. En om Christus se koms, ja, die deurbraak van sy koninkryk hier en nou, met blydskap in te wag.
Die gevaar – dit sien ons in hierdie gelykenis – is dat die kerk, net soos die vyf onverstandige meisies, in so ʼn uur wanneer God sy volgelinge roep om wakker te wees, om hulle lig brandend te hou, insluimer en só sy roeping verloor.
Laat ons daarom vandag weer stil word, ophou kla en nadink hoe ons Christus met groter oorgawe en veral met blydskap kan bly dien.
Selfs al is dit nag.
O Here, vergewe ons dat ons so maklik insluimer en ons roeping verloor. Help ons om vandag meer waaksaam te wees en u wil met groter oorgawe te soek. Amen.
Carel Anthonissen
