My hele wese sien uit na my Heer, meer as wat wagte uitsien na die môre, ja, as wagte na die môre (Psalm 130:6).

Ons hou nie regtig van wag nie. Wag maak dat ons beplanning skeefloop, dat ons voel ons mors tyd.

En hier is nou vier weke in die kerkjaar wat wagtyd is – Advent. Advent herinner ons dat wag ʼn Bybelse tema is. Dat wag goed is. Dat wag nie tydmors is nie.

Psalm 130:4-5 is ʼn voorbeeld van wag en geloofsvertroue:

“Ek wag op die Here; my hele wese wag,
en op sy woord vestig ek my hoop.
My hele wese sien uit na my Heer,
meer as wat wagte uitsien na die môre,
ja, as wagte na die môre.”

Advent nooi ons om te oefen om te wag, want wag is ʼn ingesteldheid van afhanklik wees. Dit is ʼn teken van vertroue en ʼn verlange om te ontvang. Nie om die dinge van God te ontvang nie, maar om in Advent vir God self te ontvang.

Here, wag is nie lekker nie. Laat ons tye van wag ons afhanklikheid van U versterk, want ons wag op u koms, Here. Amen.

Lisel Joubert