Maar ek vertrou op U, Here, ek sê: U is my God. My tye is in u hand (Psalm 31:15-16).

In die boek Shadow van die bekende skrywer Carel van der Merwe kom die hoofkarakter, Paul du Toit, in ʼn stadium tot hiérdie gevolgtrekking oor sy lewe.

“Ten diepste bly die lewe onvoorspelbaar en onbeheerbaar. Ons is niks meer nie as dryfhout wat rondgespoel word deur ʼn doellose en kwaadwillige krag wat nooit tot rus kom nie.”

Al is hierdie fatalistiese gevoel oor die lewe die ervaring van baie mense – en dit sluit gelowiges in – praat die Bybel tog anders hieroor. Male sonder tal sê die Bybel dat die lewe, ondanks vele tragiese en onverklaarbare dinge, van goeie magte omring bly.

Meer nog, só getuig die Bybel, óns lewe is in goeie hande – in die hande van die God wat, in die woorde van ʼn bekende lied, omgee vir mens, plant en dier. Die God wat ons deur en deur ken (Psalm 139) en wat deur Christus belowe het dat geen haar van ons hoof sal val sonder sy wete nie.

Al kan ons die aard van God se sorgende teenwoordigheid nie altyd peil nie, kan ons daarop vertrou. Ons kan weet ons word nie aan onsself, of aan ander of aan ʼn donker noodlot oorgelaat nie, maar ons bevind ons elke dag, tot aan die einde van ons lewe, in die holte van God se hand.

Inderdaad, ons tye, ons hele lewe, is in God se hand.

Here, dankie dat naas soveel onpeilbare dinge ons één waarheid kan weet: U lei ons en ons is altyd in die veilige holte van u hande. Amen.

Carel Anthonissen