Wees daarom verstandelik wakker en nugter, en vestig julle hoop volkome op die genade (1 Petrus 1:13).

Behalwe vir goeie medikasie, kan die regte woord op die regte tyd ook oormatige angs help verlig. Veral wanneer ons moeite doen om ons gedagtes in stilte met só ʼn woord te vul en voortdurend daarin te gaan rus.

Een so ʼn woord is Petrus se vermaning om verstandelik wakker en nugter te wees (1 Petrus 1:13).

Die Engelse vertaling van hierdie teks is nog meer sprekend en van hulp. Dit lui: “Therefore gird up the loins of your mind, be sober, and hope to the end for the grace that is brought unto you at the revelation of Jesus Christ.”

Die Griekse woord vir “om wakker en nugter te wees” was oorspronklik ʼn herinnering aan atlete om hulle lang gewade of kledingstukke op te lig en vas te gord sodat hulle gemakliker sou kon hardloop.

Toegepas op die wêreld van ons denke of verstand beteken dit ons moet al daardie los, negatiewe en irrasionele gedagtes wat ons so pla en oorangstig maak doelbewus onder beheer kry.

Meer nog, dit vra van ons om hierdie skadelike gedagtes elke dag God in se hande te plaas met die verwagting dat sy genade genoeg sal wees om dit te bedwing en selfs uit te skakel. Sodat ons ons gedagtes meer kan vul met alles wat waar, edel, reg, mooi en prysenswaardig is (Filippense 4:8).

Só sal ons die angs kan help hokslaan.

Here, terwyl ek let op daardie gedagtes wat my so angstig maak, gee ek dit opnuut in u hande oor. Amen.

Carel Anthonissen