Boodskap vir Vandag

Search
Close this search box.
Search

Woorde wat genees

Julle woorde moet altyd in goeie smaak wees, met sout besprinkel, sodat julle kan weet hoe om ʼn ieder en ʼn elk te antwoord (Kolossense 4:6, Direkte Vertaling).

Daar is ʼn Afrikaanse spreekwoord wat met dié interessante frase begin: “Woorde wek …”

Die implikasie hiervan is duidelik. Woorde het ʼn bepaalde krag. Dit het die vermoë om iets in jou wakker te maak, iets in jou op te wek. In sommige gevalle kan dit woede en frustrasie wees. Ander kere kan dit iets mooi en verrassend wees.

Presies soos die woorde van ʼn vrou aan ʼn gevangene in hierdie verhaal.

Sy was deel van ʼn groep wat ʼn kursus aan jong oortreders aangebied het. Die kursus sou hulle help om hulle verlede te konfronteer. Belangriker nog, om hulle verlore potensiaal te ontdek en te omhels.

Met verloop van die kursus het sy ʼn besonderse band met Kenny ontwikkel. Kenny was op sy dag ʼn geharde bendeleier. Maar sy het gesien dat daar agter sy harde gesig ʼn ander mens, vriendeliker en sagter, skuil. Sodat sy hom op ʼn dag “kind Kenny” begin noem het.

Met dié woorde het sy, sonder dat sy dit besef het, aan ʼn diep snaar en innige verlange in hom geraak. Want die volgende oomblik het hierdie rowwe en geharde man in trane uitgebars. Tussen sy gesnik deur kon sy hom hoor prewel: “Niemand het dít nog ooit vir my gesê nie.”

Dié ware gebeurtenis, wat ʼn spanlid van die vrou die afgelope week vir my vertel is, het my opnuut oortuig dat ons woorde ʼn verskil kan maak.

Paulus het reeds geweet ons woorde is met sout besprinkel en kan daarom genesend wees.

O Here, gee ons vandag die regte woorde wat ander, soos sout, kan genees. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.