Julle geloofsvertroue moet julle dus nie prysgee nie: dit hou groot beloning in (Hebreërs 10:35).

Een van die belangrikste aspekte van geloof is dat geloof nooit staties is nie.

Dit bevat geen finale sekerheid nie; dit is nie ʼn soort besitting waaroor gelowiges beskik en wat onveranderlik bly nie.

Inteendeel. Geloof is ʼn weg waarop God ons oor tyd heen dieper in sy wil inlei. Meestal is dié weg een van groeiende selfopoffering – ʼn pad waarop ons, soos die dissipels van ouds, geroep word om gedurig die aard en rigting van ons lewe te ondersoek. En om weg te stap van alles wat God se Gees verhinder om ons te herskep tot meer volwasse en liefdevolle mense.

Om dié rede – omdat geloof ʼn leergang is waarop God deur sy Gees gedurig in en deur ons werk – is geloof altyd dinamies en hoopvol. Ons kan daarom met verloop van ons lewe verwag dat ons geloof ook ander gestaltes sal aanneem. Selfs splinternuwe uitdagings en opwindende ervarings kan meebring.

ʼn Bekende en toegewyde Hollandse regsgeleerde wat 90 jaar oud geword het, se opmerking hieroor bevestig dit. Op ʼn vraag van een van sy seuns, self ʼn teoloog, of hy nog alles glo soos vroeër, het die regsgeleerde eerlik en opgewonde geantwoord: “Ja, ek glo nog alles, maar alles anders.”

Hierdie bejaarde man het, soos die Hebreërskrywer, geweet dat geloof groeikrag besit en daarom ʼn eie beloning kan inhou.

Daarop kan jy vertrou.

Here, u pad met ons is vol verrassings, selfs onverwagte belonings. Help ons om nooit daaraan te twyfel nie. Amen.

Carel Anthonissen