Wees altyd bly. Bid gedurig. Wees in alle omstandighede dankbaar, want dit is wat God in Christus Jesus van julle verwag (1 Tessalonisense 5:16-18).

Dit is duidelik uit die Bybel dat gebed nie net ons geloof en vertroue in God staaf nie; dit is ook die manier waarop gelowiges se verhouding met God voortdurend gevoed en verryk word.

Vandaar Jesus se aandrang dat sy volgelinge sal bid.

Paulus beklemtoon die noodsaak van gebed deur selfs te pleit dat ons gedurig, sonder ophou, sal bid – bedoelende dat ons hele lewe, elke faset daarvan, elke dag, bewustelik as ʼn antwoord aan God geleef sal word.

Wat dít beteken, het Teofanus, ʼn biskop uit die 19de eeu, só beskryf:

“In prayer, the principal thing is to stand before God with the mind in the heart, and to go on standing before God unceasingly day and night until the end of life.”

Let wel, Teofanus roep ons hier nie op om iewers in afsondering te gaan te kniel nie, al is dit ook by tye baie nodig. Nee, hy roep ons hier op om elke dag, te midde van die vaart en gewoel van ons lewe, met ʼn oop hart en nugter denke voor en met God te leef.

So, by uitstek, antwoord ons God. En wag ons op sy Woord en sy leiding.

In gebed.

Here, help ons om vandag te glo dat U elke oomblik by ons is. En dat ons hele lewe derhalwe ʼn gebed tot U is. Amen.

Carel Anthonissen