Boodskap vir Vandag

Search
Close this search box.
Search

Here, leer my!

Sy draai na Hom toe en sê in Hebreeus vir Hom: “Rabboeni!” Dit beteken leermeester (Johannes 20:16).

Wanneer Jesus in Johannes 20:16 vir Maria Magdalena troos deur haar naam te noem, antwoord sy met die uitroep: “Rabboeni!”

In Hebreeus, so vertel hierdie Skrifgedeelte dan vir ons, beteken dié uitroep “leermeester”.

Maria se reaksie hier is merkwaardig omdat sy een van min was wat Jesus so genoem het. Jesus is meer dikwels as “Meneer” aangespreek (Markus 12:19), of as “Rabbi” (14:45). In Markus 8 bely Petrus selfs dat Jesus die langverwagte “Christus” is, terwyl ʼn heidense offisier by die kruis uitroep dat Jesus “die Seun van God” is (15:39).

Maria noem Jesus egter Leermeester. Hierdeur gee sy in haar uur van broosheid en verwarring te kenne dat sy weer, soos in die verlede, by Hom wil leer; dat sy wil hê Hy moet haar onderrig oor die pad vorentoe.

Vir die gelowige sit daar in hierdie bykans onskuldige aanspreekvorm ʼn groot uitdaging. En dit is om, soos Maria Magdalena, ons oë en ore oop te hou vir die lesse wat opgesluit lê in ons oomblikke van teleurstelling en verlies, van pyn en lyding. Ja, om in sulke tye ook te bid of uit te roep: “Rabboeni!” met die bedoeling: “Here, leer my.”

Tereg merk iemand onlangs op: “Ons bloei nie verniet nie. Ons pyn kan ʼn leerskool word, selfs ʼn nuwe roeping inhou.”

Presies soos met Maria Magdalena gebeur het.

Here, leer ons vandag hoe daar uit ons pyn en verlies ʼn nuwe roeping gebore kan word. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.