Boodskap vir Vandag

Search
Close this search box.
Search

Wees gelowig!

Daarna sê Hy vir Tomas: “Bring jou vinger hier en kyk na my hande; en bring jou hand en steek dit in my sy; en moenie langer ongelowig wees nie, maar wees gelowig” (Johannes 20:27).

Die verhaal oor die ontmoeting tussen Jesus en die twyfelende Tomas bevat groot troos.

Dit help ons onder meer om nie onnodig skuldig of sleg te voel wanneer ons op ʼn dag, soos Tomas, in ons gemoed allerlei twyfelvrae ontdek nie. Gelowiges, so herinner hierdie verhaal ons, is nooit vry van twyfel nie en moet eerlik daaroor wees.

Tog, en hieraan herinner die Bybel ons ook, kan twyfel gevaarlik wees. Want sien, ʼn mens kan vasval in twyfel, selfs daarop verlief raak. En dit dan deel maak van ʼn soektog wat nooit eindig nie. ʼn Soort eerlikheid waarop jy heimlik trots is en wat die kiem van ongeloof in hom omdra.

Die filosoof Lessing het op ʼn keer hieroor gesê: “As God in sy regterhand die waarheid en in sy linkerhand die soeke na die waarheid het, sal ek altyd laasgenoemde kies.”

Natuurlik bly ons ons lewe lank soekers, maar dan soekers wat óók daarop ag sal slaan wanneer die opgestane Jesus vir Tomas sê: “Moenie langer ongelowig wees nie, maar wees gelowig” (Johannes 20:27).

Daarmee het hy Tomas uitgenooi om in Hóm die waarheid van alles, ook van sy eie lewe, voortdurend te leer ontdek.

Die uitnodiging geld natuurlik vandag ook vir jou.

O Here, as ek eerlik is, moet ek erken dat Tomas se twyfel ook in my leef. Bewaar my daarvan dat dit in ongeloof en onverskilligheid sal oorgaan. Gee my vandag weer die geloof wat U van my vra. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.