Boodskap vir Vandag

Search
Close this search box.
Search

Van hero tot zero

Op hoogmoed volg ondergang, op selfverheffing volg die val (Spreuke 16:18).

Ek glimlag wanneer my jong vriend sy storie vertel.

Hoe hy ná die geboorte van hulle eerste kinders – ʼn tweeling – hardkoppig geweier het dat sy ma afvlieg om te kom help. “Ons kan dit self doen,” was sy argument.

Maar toe, ná twee vermoeiende en slapelose nagte, vertel hy, bevind hy hom een oggend met die telefoon in sy hand. “Ma, jy moet asseblief kom help. Ons het jou nodig!”

Dit is nou al dertien jare later. Maar hy lag steeds wanneer hy dié storie vertel. En eindig dan met hierdie woorde: “Ja, so het ek geval van hero tot zero.”

Wat my vriend destyds geleer het, is ʼn ou Bybelse waarheid: ʼn Mens moet van tyd tot tyd jou trots sluk en aanvaar: Ek is nie die sterk en onafhanklike held wat ek gedink het ek is nie. Ek het ander mense nodig. Ook die God wat my in my swakheid kan bystaan.

Wie hulle swakhede en afhanklikheid eerlik aanvaar en erken, wen heelpad.

Hoe bedrieglik en trots is die hart nie, Here! Leer ons vandag opnuut dat ons krag in nederige afhanklikheid van U en van ander mense geleë is. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.