Boodskap vir Vandag

Search
Close this search box.
Search

Om ʼn skaduwee vir ander te wees

Ek het vir jou gesê wat jy moet sê, en jou beskerm in die skaduwee van my hand, want Ek het die hemel oopgespan en die aarde se fondamente gelê en vir Sion gesê: “Jy is my volk” (Jesaja 51:16).

Onlangs vertel ʼn familielid hoe sy in ʼn stadium moeite gedoen het om te luister en om te sien na iemand wat haar sorg en aandag dringend nodig gehad het.
Dit terwyl ander, selfs goeie vriende en kollegas, onbewus was van hierdie persoon se nood. En daarom onnadenkend daaraan verbygeleef het.
Agterna het hierdie persoon haar waardering op ʼn besonderse manier aan my familielid te kenne gegee. Haar woorde was: “Dankie dat jy vir my ʼn skaduwee in my tyd van onsekerheid en nood was.”
Tog ʼn mooi beeld – om ʼn skaduwee vir ʼn ander te wees. Iemand wat in tye van nood – wanneer die spreekwoordelike hitte van ʼn situasie dreig om iemand te verseng en tot wanhoop uit te mergel – ʼn skuilplek van verkwikking en rus vir hom of haar kan wees.
Ek wonder of jy weet dat God vandag, soos in die dae van Jesaja, ook vir jóú so ʼn skaduwee van rus en beskerming wil bied. Lees maar weer Jesaja 51, veral vers 15-16. Wie dít weet en glo, sal ook weet hoe om vir ander ʼn skaduwee te wees.

Here, dankie dat U vandag weer die skaduwee van u hand oor ons hou. Help ons om dit ook vir ander te doen. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.