Boodskap vir Vandag

Search
Close this search box.
Search

God vir ons

God is vír ons, wie kan dan teen ons wees? (Rom 8:31).

God is anders as ons. Sy “eienskappe” is anders. Die hemel is sy woonplek. En tog kan geen woonplek Hom bevat nie. Hy is die Skepper van hemel en aarde, van die mense en die diere. Maar ook van die kleinste besonderhede: van die fynste kleurnuanse in ʼn blomblaartjie tot die geringste goggatjies in die grond. Hy is by sy skepsels en tog ook teenwoordig anderkant die eindpunt, anderkant die ander kant van die heelal. Hy is groter as ons denke, hoog bo ons gedagtes. Tussen ons en Hom is ʼn oneindige kwalitatiewe onderskeid. God is in ʼn ander “klas” as ons.

Maar dan is die woord klas al weer te menslik. God val in geen klas nie. Hy is onvergelyklik. Hy is eenvoudig net … gróót!

En tog is hierdie grote God vír ons! En, as God vír ons is, wie kan dan teen ons wees? (Rom 8:31). God gee om vir mense, ook vir die geringes en onbelangrikes, dié wat eensaam en verstote is.

God sien nie met groter sorg om na sommige as na ander nie. Hy dink aan ons almal (Ps 8:5). Ons vorm deel van sy gedagtegang. Hy het ons uitgedink. Ons is sy breinkinders! God is nie só anders, só groot, só besig dat Hy nie aan ons dink of nie vir ons omgee nie. Nee, die grote, gans anderse God dink … aan jou!

God is nie só anders, só groot, só besig dat Hy nie aan ons dink of vir ons omgee nie.

Vader, vir U moet die mense op die aarde seker soos miljoene miertjies lyk. Ek is een van hulle. En tog is geen mens vir U soos ʼn mier nie. Ons is mense, u mense, van wie U alles weet. U laat nie op my trap nie. Amen.

Johan Cilliers

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.