Boodskap vir Vandag

Search
Close this search box.
Search

Familielede het gewone name

“Hulle hou van die ereplekke by die feesmaaltye, en van die voorste plekke in die sinagoges en om op straat deur die mense begroet en as ‘rabbi’ aangespreek te word. Maar julle moet julle nie ‘rabbi’ laat noem nie; net Een is julle Leermeester en julle is almal broers. Moet niemand hier op aarde as ‘vader’ aanspreek nie, want Een is julle Vader: die Vader in die hemel. Julle moet julle nie ‘leiers’ laat noem nie, want Een is julle Leier: die Christus. Maar die grootste onder julle moet bereid wees om die ander te dien. Wie hoogmoedig is, sal verneder word, en wie nederig is, sal verhoog word” (Matteus 23:6-11).

Toe ek onlangs vir iemand sê ek is nie “dominee” nie, sommer net “Stephan”, sê hy dis uit respek dat hy my “dominee” noem. “Maar die Here noem my op my naam,” sê ek vir hom.

Die titel “dominee” herroep ongelukkig by my die Latynse oerbetekenis van “my heer”. “Pastoor” stam weer af van die Latynse term pastor, wat “herder” beteken. Dis seker hoekom mense so graag na kerkleiers verwys as hulle herders en na gemeentelede as die kudde.

Ek het toe so ’n bietjie gaan rondkrap om hierdie titel-ding beter te verstaan. In ’n boek van Jon Zens, The pastor has no clothes: Moving from clergy-centered church to Christ-centered ekklesia, lees ek toe wat Dan Cozart sê: “The pastor shouldn’t be called by his first name … At times first names can be fitting and appropriate, but not for parents, judges, law officers, nor for preachers. It’s a matter of respect for the position and office. A pastor may be called Bishop, Elder, Pastor, or Brother … How very true the statement, ‘Familiarity breeds contempt.’ Refraining from calling a Pastor by his first name doesn’t mean he’s more spiritual than his flock, but it does mean he holds the highest office in the church, namely that of God’s under-shepherd, which demands respect.”

Waag jy dit om hierdie “kerklike protokol” te oortree, het jy moeilikheid. Hoe vreemd dat soveel mense dink respek is sinoniem met formaliteit. Of met die gebruik van titels. Nee, ek het nie ’n probleem met funksionele titels in die samelewing nie. As ek ’n medikus “Dokter” noem, is dit binne ’n professionele konteks. Dieselfde geld vir ’n kaptein op ’n vliegtuig … totdat ek hulle beter leer ken, natuurlik.

Die kerk is egter nie ’n professionele ruimte nie. Dit is die Here se aardse familie wat duur gekoop is. Hier is familietaal nie formeel nie, maar intiem. Soos in enige gesonde familie oorbrug omgeetaal die afstand tussen mense. Dit vermy mensgemaakte grense. As ons dit snap, sal ons ophou om ander gelowiges vroom-vroom as “u” aan te spreek.

Ons sal mekaar op die naam noem, mekaar steeds met respek behandel, en innig vir mekaar omgee en mekaar dien, ongeag ons aardse titels.

My Vader, dankie dat U familieterme gekies het as die manier waarop U ons verhoudings met mekaar en ons verhouding met U wil kenmerk. Help my om nie op mensgemaakte titels en status te fokus nie, maar om u liefde en respek uit te leef sodat ander ook graag familiêr met U en u familie sal wil wees. Amen.

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.