Ons almal weerspieël die heerlikheid van die Here, want die sluier is van ons gesig af weggeneem. Ons word al meer verander om aan die beeld van Christus gelyk te word. Die heerlikheid wat van ons uitstraal, neem steeds toe. Dit doen die Here wat die Gees is (2 Korintiërs 3:18).

“Ek het maar so grootgeword.”

Dit het al ’n cliché geword. Vir baie mense is dit die algemene verskoning om nie te verander nie. Baie meen hulle kan nie by vandag se vinnige wêreld aanpas nie. Dit is nie waar nie. In The Shallows, wat gaan oor die uitwerking van die nuwe digitale era op mense se denke, vertel Nicholas Carr van ’n studie van 2008 waarin mense wat oor geen rekenaarvaardighede beskik het nie se breine tydens internetgebruik vergelyk is met dié van rekenaarkenners.

Gary Small, ’n psigiatrieprofessor van die VSA, en twee van sy kollegas het 24 vrywilligers vir die studie gekies. Die vrywilligers is gelykop verdeel tussen rekenaarkenners en -niekenners. Ná die eerste eksperiment, waarin almal soektogte op Google moes doen, was die breinaktiwiteit van die kenners veel meer as dié van die niekenners. Toe het die navorsers laasgenoemde groep vyf dae lank een uur per dag op die internet laat rondsoek. Op dag ses is dieselfde toets met die 24 kandidate herhaal. Toe bevind hulle dat presies dieselfde dele van die brein in albei groepe aktief was. Navorser dr Gary Small vat dit soos volg saam: “Five hours on the internet, and the naive subjects had already rewired their brains.”

Daar is geen verskoning vir relatief gesonde mense om nié tot en met ’n hoë ouderdom te bly leer en groei nie. Ons brein is leerbaar en aanpasbaar. Alhoewel hierdie plastisiteit, soos dit genoem word, in later jare ietwat afneem, gaan dit nooit heeltemal weg nie. Dit is net ons eie skuld as ons koppe bly vassteek in uitgediende denkpatrone. Al het ons op ’n sekere manier grootgeword, hoef ons nie so oud te word nie. Ons brein is deur die Here bedraad om lewenslank te bly groei.

Dit is hieruit dat my “neurologiese” gebed ontstaan het: “Rewire me, o Lord.” Die geheim is om Godwaarts te bly groei, en nie selfwaarts nie. Gelukkig is ons onder permanente konstruksie van die Heilige Gees. Hoe meer ons die Here se skatkamers besoek, hoe meer verander ons na sy beeld. In die taal van 2 Korintiërs 3:18: Die heerlikheid wat van ons uitstraal, neem steeds toe.

Hemelse Vader, dankie dat U my geskep het met die kapasiteit om altyd nuut te leer dink en doen. U is aanhoudend besig om my te verander om al hoe meer soos U te wees. Dankie dat u Gees permanent ’n “onder konstruksie”-bordjie by my lewe gehang het. Amen.