Ons wat hierdie skat in ons het, is maar kleipotte wat maklik breek; die krag wat alles oortref, kom dus van God, nie van ons nie (2 Korintiërs 4:7).
God se krag werk deur swak menslike houers. Paulus moes op die harde manier leer hy is nie ’n eindverbruiker of ’n persoonlike vertoonvenster van die Here se krag nie. Hy is ’n swak menslike geleier daarvan. Ook moes hy ontdek hy kort nie krag nie, maar genade.
Ons menslike swakhede is God se geleenthede. Hierteenoor is menslike kragvertonings geleenthede vir spog oor wie die sterkste is. In Jesus se kring gaan dit nie oor hierdie soort krag nie. Dit gaan oor kindwees en oor genade. Wanneer krag wel ter sprake is, soos in Handelinge 1:8, gaan dit oor die krag om oor Jesus te praat. En in 2 Timoteus 1:7-8 gaan dit oor die krag om te volhard op die lydenspad van Christus. Kortom, geestelike krag lyk heeltemal anders as krag in die wêreld.
Gelowiges ervaar nie aldag die Here se groot krag nie. Net soos ’n dun elektriese draadjie nie die krag voel wat daardeur vloei nie, hoef ons nie eers sterk te voel voordat ons die Here kan dien nie. Ons is swak geleiers van aardskuddende hemelse krag na ander menslike eindverbruikers. Ja, ons self is nooit die eindverbruikers van God se krag nie. Daar oorkant die pad is die ware eindverbruikers. Ons moet die hemelse kragkabels oor die pad aanlê na dié mense wat God se liefde kortkom. En die hele tyd kan ons krag put uit God se genade.
Ek hou so baie van wat Jaco Strydom gesê het: “I’d rather go to God with my brokenness than with my promises.” Ons is nie superdissipels nie. Dissipels is breekbare erdekruike, soos Paulus in 2 Korintiërs 4 skryf. Ons kry soms diep seer. Dikwels is ons broos en breekbaar. Ons struikel soms. Menigmaal is ons oor raad verleë. Soms stel ons ander mense teleur. Nogtans is die Here vol genade en ontferming. Hy hou nooit op om Hom oor elk van sy kinders te ontferm nie. God se genade is in alle omstandighede vir ons genoeg.
Vader, dankie dat ek nie ’n super-dissipel hoef te wees nie, want die krag kom van U af. Help my om ’n goeie geleier van u krag te wees. U krag in my is soos ’n skat in ’n kleipot. Dankie dat ek elke dag u genade ontvang sodat ek dit kan laat oorvloei na ander wat u genade ook so nodig het. Amen.
