Maar aan God die dank! Hy voer ons altyd saam in sy triomftog omdat ons een is met Christus. Deur ons versprei Hy die kennis van Christus oral soos ’n aangename geur. Ons is die wierook wat deur Christus vir God gebrand word, waarvan die geur dié bereik wat gered word, sowel as dié wat verlore gaan (2 Korintiërs 2:14-15).

Toe iemand eendag vir my sê hy wil my met ’n geskenk seën, was ek sprakeloos. Toe gaan dink ek diep en besef dis presies wat die Here van ons verwag. Ons moet ’n lewende seën vir mekaar wees. Ons moet mekaar seën met ons talente en gawes. Ons teenwoordigheid moet suurstof vir ander wees.

Paulus het dit gereeld gedoen. In Romeine 1 skryf hy dat hy op pad is Rome toe om die gelowiges daar met geestelike geskenke te oorlaai. Tog sien hy ook uit om die geestelike geskenke wat die Here in hulle lewe weggebêre het by hulle te ontvang. In 2 Korintiërs 2 skryf Paulus dat ons die aroma en aangename geur (of wierook) van God is wat die reuk van Christus afgee. Kortom, ons is ’n geur wat lewe bring. Ten diepste is ons bedoel as ’n seën vir die wêreld en vir mekaar.

Dissipels van die Here seën ander met hulle daar-wees, met ’n gebed, met ’n snytjie brood, met ’n beker water, deur op te staan teen onreg, deur namens die stemloses te praat. Dissipels doen tydig en ontydig goeie dinge vir ander, soos Paulus in Romeine 12 skryf.

Dit herinner my aan oom Con, ’n wonderlike man in ons gemeente toe ek ’n kind was. Ons jeuggroep het een jaar met Kersfees ’n ete vir gestremde kinders gehou. Oom Con het daardie dag saam met ons kom werk. Toe kos dit ’n outjie van die kinderhuis om woorde aan hierdie man se impak te gee. Tydens die ete het die seuntjie uit die bloute gevra: “Is Oom se naam dalk Jesus?”

Ek sal dit nooit vergeet nie. Mense wat ’n lewende seën word, vergeet van hulle eie behoeftes. Hulle kies om dag vir dag doodgewone dinge vir ander mense tot eer van die Here te doen. Dit is juis in die alledaagse dinge wat ons vir ander doen dat die Here se nabyheid sigbaar word.

Here Jesus, gebruik my as ’n aangename geur in die wêreld. Ek wil ander mense seën, soos U my seën. Mag U sigbaar word in my alledaagse dade en optrede in die wêreld. Al my tyd, besittings en vermoëns behoort aan U. Gebruik my. Amen.