Dit is dieselfde kragtige werking van sy mag wat Hy uitgeoefen het toe Hy Christus uit die dood opgewek het (Ef 1:19-20).
Die belydenis oor die opstanding van die liggaam getuig nie net van ’n toekomstige gebeurtenis nie, maar ook van ’n huidige, daaglikse werklikheid. Want dieselfde krag waardeur ons eendag sal opstaan, is tans reeds in ons aan die werk. Dit wek ons nou, en telkens weer, uit die dood op, dit wil sê, uit die sonde.
Ons moet verstaan, sê Paulus, hoe geweldig groot die krag is wat God uitoefen in ons wat glo. “Dit is dieselfde kragtige werking van sy mag wat Hy uitgeoefen het toe Hy Christus uit die dood opgewek het” (Ef 1:19-20).
Die opstanding van Jesus roep ons elke dag op tot ’n opstanding uit die dood van die sonde. Dit wek in ons die begeerte tot daaglikse bekering, om die ou mens af te sterwe en die nuwe mens te laat opstaan (Heidelbergse Kategismus, Sondag 33, Vraag 88). Die opstanding van Jesus maak ons opstandig teen die sonde in ons lewe en in die wêreld. Jesus se opwekking uit die dood maak ons opgewek oor die krag van God wat in ons werk, oor die hoop!
Dit beteken prakties dat ons nie maar ons sonde en kragteloosheid gelate moet aanvaar nie. Ons kan, ons móét tot bekering kom. Vandag. Jy kan daardie sonde waaraan jy nou dink, aflê. Jy kan uit jou skynbaar hopelose situasie loskom. Nie omdat jy verbete moed aan die dag lê of in jouself die potensiaal daartoe het nie, maar omdat Jesus uit die graf is. Dáárdie krag werk in jou!
Maak dit jou opstandig teen die sonde? En opgewek?
Here, ek staan op. Hef U my op. Amen.
