Nou ken ek net gedeeltelik, maar eendag sal ek ten volle ken, soos God my ten volle ken (1 Kor 13:12).

Die geskiedenis is nie altyd “logies” te verstaan nie. Daar gebeur so baie onbegryplike dinge, raaisels waarvan ons die “sin” met die beste wil ter wêreld nie kan ontrafel nie. Waarskynlik kan jy ’n paar sulke gebeurtenisse in jou lewe opnoem. Waarom moes my man, vrou, kind, geliefde juis toe sterf? Juis só sterf? Waarom moes ek siek word? Waarom die doring in my vlees? (2 Kor 12:7). Ons hoor nie die antwoorde nie. Baie dinge bly tot die einde van ons lewe ’n misterie.

Paulus het dit ook ervaar, want ons hoor hom sê: “Nou ken ek net gedeeltelik …” (1 Kor 13:12). Ja, die God agter al die gebeure handel dikwels anders as wat ons sou wou gehad het … of kan begryp. Dit is soos om ’n kunstenaar dop te hou wat aan ’n skildery werk. Eers verstaan jy nie wat hy doen nie. Uit die paar strepe en kleurkolle van sy aanvanklike werk kan jy nie veel wys word nie. Dit lyk so deurmekaar, lelik … totdat jy die eindproduk sien! Dan begin die figure en kleure sin maak, dan eers verstaan jy die belangrikheid, die dieper betekenis van die vooraf arbeid.

Ons lewe is ook só. Nou soms nog raaiselagtig, maar ons weet die Kunstenaar sal die prentjie voltooi, en dat dit mooi sal wees, goed sal wees. Die Bybel belowe dat ons eendag ten volle sal ken soos God ons ten volle ken (1 Kor 13:12). Ons sal die hele prentjie sien en die betekenis van alles verstaan.

Want dié Kunstenaar is ’n meester.

Meester, skilder my ook op u doek. Amen.