Boodskap vir Vandag

Search
Close this search box.
Search

Bewonderaars

Lees Johannes 12:20-26.

“As iemand My wil dien, moet hy My volg …” (v 26).

Die Joodse paasfees lok toe soos altyd ’n klomp mense, ook Grieke wat vir Jesus wou ontmoet. Só vertel Johannes ons. Hulle het sekerlik gehoor van alles wat Hy doen en sê, en nou wil hulle kom kyk waaroor die bohaai gaan. As hulle gelukkig is, kan hulle huis toe gaan en vertel: Weet julle wat het óns gehoor en gesien?

Maar vir hierdie nuuskieriges en bewonderaars en toevallige meelopers het Jesus ’n harde boodskap: Die pad agter My aan is geen gemaklike, breë hoofweg nie. Dit is in vele opsigte ’n alter­natiewe roete, ’n smal, uitdagende kronkelpad. Daar kom dikwels donker dieptes voor.

En dit is lewensgevaarlik. Jesus gebruik woorde soos “sterf ” en “lewe verloor” (v 24-25) wanneer Hy hieroor met hulle praat. Dissipelskap is duur.

Bewondering, aan die ander kant, kos niks. Dit is maklik, dikwels opwindend en hou soms groot beloning in. Dit is ook doodveilig, want dit geskied uiteraard op ’n afstand. En ’n bewonderaar het altyd vriende, hulle vir wie jy die objek van jou bewondering kan uitwys en sê: Kyk net daar! En: Is dit nie bewonderenswaardig nie!

Gelukkig vir bewonderaars hoef hulle nie veel meer as dit te doen nie. Gelukkig word daar van bewonderaars niks gevra en nie juis enigiets verwag nie. As hul bewondering mettertyd taan, dan is dit maar so …

Ongelukkig, sê Jesus, vra liefde veel meer as bewondering. As liefde ontbreek, sê Hy, verbeur jy die Vader se eer. En jy verloor al die sin en betekenis wat jou lewe sou kon hê.

Ek kan nie sonder U nie, Here. Wys my gereeld die pad agter U aan, u spore, en maak my gewillig én opgewonde om dit te volg.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.