Boodskap vir Vandag

Search
Close this search box.
Search

’n Geloof wat oorwin

Lees 1 Johannes 5:1-6.

En die oorwinning wat ons oor die wêreld behaal het, is deur ons geloof. Wie anders is dit wat die wêreld oorwin as hy wat glo dat Jesus die Seun van God is? (v 4-5).

“Geloof ” is ’n groot woord. Daar word baie dinge, kragtige dinge, regstreeks daaraan gekoppel. Ons praat van geloofsgenesing, by­voorbeeld. En geloofsvertroue. En geloofsheld.

Hoe groter die geloof, lyk dit, hoe kragtiger die gevolge, hoe wonderbaarliker die genesing, hoe skouspelagtiger die heldedaad. Ons lees sulke verhale in die Bybel, en tot vandag toe hoor ons sulke stories wat hulle iewers in ’n saal of ’n tent, ’n hospitaal of op ’n verhoog, in ’n binnekamer of sommer op straat afgespeel het.

’n “Groot geloof ” is ’n eretitel, ’n beskrywing wat met bewon­dering gemaak en heimlik begeer word. Dikwels as onmoontlik betreur word. Ja-nee, by die meeste van ons rym “geloof ” met “gewoon”, en is die gepaste voorvoegsel alte dikwels “klein”.

Wat sal ons doen om dit anders te maak? Hoe kan ons ’n groot geloof verkry, een wat minstens groot genoeg is? Johannes sê: Gehoorsaam die gebooie! Dit is nie moeilik nie, sê hy, enige Gods-kind kan dit regkry.

Sjoe! Daardie gebooie … en ék? Nee, dit is beslis onmoontlik!

Maar miskien is daar tog hoop vir mense soos ek. Johannes sê enigeen van God se kinders sal dit regkry. Kinders, ja. Daardie kinders wat nie sélf kan nie, wat opgetel moet word, gedra moet word. Wat hul geloof met ’n lepel moet inkry en met wie mooi gepraat moet word voordat hulle hul mond wil oopmaak.

Here, my Vader, my Moeder, voed my elke dag met die brood van die lewe!

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.