Boodskap vir Vandag

Search
Close this search box.
Search

Ligmaker

Lees 2 Korintiërs 4:5-7.

God … het ook in ons harte ’n lig laat skyn (v 6).

Niks minder nie as ’n skat, sê Paulus. Die lig wat God aangesteek het, wat soveel heerlikheid uitstraal. Kosbaar, ja, en werd om goed opgepas te word. Ten minste in ’n hemelse kluis, met ’n leërskare engele om dit te bewaak.

Toe nié. God het dit dan in ons hart aangesteek, ons verrader­like hart. Hy het dit goedgedink om dit aan ons diepste binneste toe te vertrou. Óns s’n.

Hoe vreemd!

Ja, sug Paulus, hierdie “kluis” is so broos soos ’n kleipot. Nooit kan die oppassers hulleself op die skouer klop en sê “welgedaan!” nie. Die skat is aan bedenklike bewaring uitgelewer. En niemand minder nie as God self het dit uitdruklik so gewil. Dit was nie ’n vergissing nie.

Daarom sal dit ons, die uitverkorenes, die broses, baat om ’n oomblik na te dink oor die implikasies van dit alles. Oor broos­heid, ons s’n. Oor kleipotte, ons self. En oor hoe geleidelik, selfs ongemerk, ’n kleipot begin breek: eers ’n krakie hier, dan ’n stukkie nerfaf daar. ’n Las, ’n bars.

Is dit dan die begin van die einde? Wanneer breek die oomblik aan dat God sy kosbare skat uit hierdie kleipot verwyder? Wan­neer sal Hy sy lig wegneem en op ’n beter plek gaan bewaar?

Of soek ons sy oë op die verkeerde plek? Is dit dan nie Hy wat glimlag wanneer sy lig deur die kleipot se krake skyn nie? Wat tevrede toekyk hoe die krake groter word nie? Hoe helder, hoe fors, die lig, sy lig, daardeur bars nie?

Hier is ek in my broosheid, Here! Vir weinig meer tot nut, net vir U en u lig.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.