Boodskap vir Vandag

Search
Close this search box.
Search

Hierdie lewe

Lees 2 Korintiërs 4:8-12.

Die sterwe van Jesus dra ons altyd saam in ons liggaam, sodat ook die lewe van Jesus sigbaar kan word in ons liggaam (v 10).

Hierdie lewe is nie ’n egalige, voorspelbare rit nie. Dit is nie die probleemvrye paradys wat ons mekaar tydens verjaardae toewens nie. Bowendien, en dit sê ons gewoonlik nié, het elke paradys sy slang.

Hierdie lewe is God se geskenk aan ons. Hy wou dit gee. Dit kom ons nie toe nie, dit skuld ons niks en daar is niks vanself­sprekends daaraan nie. Ons moet dit vat soos ons dit kry, en op die beste hoop.

Goddank, ons hét toe die beste gekry. Lankal. Van die begin af, om die waarheid te sê. Hy, Jesus, het vir ons die Beste geword. En Hy maak die onvoorspelbare, stamperige en soms uitmergelende rit wat ons “hierdie lewe” noem, leefbaar. Selfs genotvol.

Want Hy het raad vir ons radeloosheid, Hy maak ’n plan wan­neer ons planloos betrap word. Hy weet baie goed van die letsels wat ons in ons liggaam dra – dit is immers Syne.

Dit is in ons lewe dat sy lewe sigbaar word, skryf Paulus. Buite­standers sal vra: Waar is dié Jesus? En ons sal wys: Hier is Hy. Hier by my. Kyk die deurboorde hande waarmee Hy my elke dag dra. Kyk in die sagte oë waarmee Hy na my kyk.

Ons sal sê: Ek lewe, want Hy lewe. Die dood raas en blaas, maar Jesus het dit oorwin. Hy het opgestaan, en ek sal ook. Hy sal my nooit los nie. Hy maak my donkerste nag ’n helder dag. Kyk maar!

U het wat die heel ergste is, oorwin. U maak my, gewoonteverloorder, ook ’n wenner.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.