Boodskap vir Vandag

Search
Close this search box.
Search

Ek wag …

Lees Psalm 130.

Ek wag op die Here meer as wat die wagte op die môre wag (v 6).

Uit dieptes gans verlore, van redding ver vandaan … Dit is hoe latere lesers hier in ons omgewing dié kort psalm leer ken het. Gesing het en liefgekry het.

Dit is troostend om te weet daar is nóg mense soos ek. Nóg dieptes soos dié waarin ek my bevind. Nóg wanhoop soos myne.

Sou hy, dié digter, ook gesukkel het om te wag? wonder ek. Want wag is nie my beste woord nie. Veral nie as ek in die moeilik­heid is nie. Dan wil ek daaruit kom, en gou ook. Dan moet iemand dadelik kom help.

Soos hierdie roeper, glo ek dat die Here nie éérs voorwaardes sal stel voordat Hy die reddingstou sal laat sak nie. Dat Hy nie my slegte posisie daar in die dieptes sal gebruik om eers ’n verskoning of ’n belydenis uit my te kry voordat Hy aanbied om te help nie. Dat sy vergifnis volkome is. Dat sy genade ook hier vir my genoeg sal wees.

Maar, vra ek my dikwels af, wat is genadig aan wag?

Behalwe dalk dat jy in die put die kans kry om alleen te wees. Om daar, in die afwesigheid van ander wat jou paai, eerlik te wees met jouself. Jou ’n klompie dinge af te vra, byvoorbeeld: Hoe het ek hier beland? Wie se skuld is my donker dieptes?

En dalk iets soos: Wat kos dit God om te vergewe? Wat is die prys vir dié reddingstou?

Straks ook: Wat is die eerste ding wat ek gaan doen nadat die Here my hier uitgehaal het?

Ek weet U sien my, Here. Ek weet u tyd is die regte tyd, ook vir my. Ek sal wag.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.