Boodskap vir Vandag

Search
Close this search box.
Search

Koninkrykswerk

Lees Markus 6:7-13.

“En as ’n plek julle nie wil ontvang en die mense nie na julle luister nie, gaan dan daarvandaan weg” (v 11).

Die dissipels sou straks iets oor gasvryheid, en veral die gebrek daaraan, uit Jesus se ondervinding in Nasaret geleer het. Daarom het hulle vermoedelik aandagtig geluister toe Hy hulle twee-twee uitstuur om sy koninkrykswerk in ’n aantal plekke te gaan doen.

Moet niks saamvat nie, maan Hy hulle, reis lig. Koninkryks­werk is swaar genoeg. Om ander te probeer oortuig is nie ’n ligte­like saak nie.

Koninkrykswerk bring jou uiteraard in aanraking met mense. Sommige sal goed en gaaf wees, ander minder so. Soms sal hul gedrag iets met jou teenwoordigheid en optrede te doen hê, maar dikwels eerder met hul eie persepsies en opvattings en persoonlike geskiedenis.

Oor eersgenoemde het jy in ’n mate beheer, oor laasgenoemde geen. Mense, alle mense, het maar hul ou dingetjies …

Uiteindelik sou die dissipels se avontuur meer inhou as ’n studie oor menslike gedrag. Veel meer as ’n berekening van die graad van gasvryheid waarmee hulle ontvang is. Dit sou die hoorders se reaksie op die Jesusboodskap meet en ’n antwoord op daardie onontwykbare vraag afdwing: Wie, sê julle, is Ek?

Jesus het die dissipels die mag gegee om duiwels uit te dryf en siekes gesond te maak, en dit het hulle gedoen. Dit het sekerlik die beswaardes se gemoed en die siekes se seer verlig. Maar die koninkryksvraag bly: Het hulle geweet dit is Hý? Weet hulle dat Hy die Koning is? Sal hulle Hom glo?

Here, U vertrou ook vir my in u diens. Leer my gereeld die antwoord op u vrae.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.