Boodskap vir Vandag

Search
Close this search box.
Search

Die arme herders

Lees Jeremia 23:1-6.

Julle het my skape uitmekaargejaag … hulle nie opgepas nie, en daarom … (v 2).

Herders het dit nie maklik nie. Bloot die feit dat skape ’n oppasser nodig het, wys dat hulle … wel, skape is. Geneig tot rondloop, wegloop. Afhanklik vir alles – behoorlike weiding, water op die regte tyd, beskerming teen al wat pestilensie is.

Die herder kry dit ook op ’n ander plek hotagter. Sien, hy is mos nie die skape se eienaar nie. Hy moet aan die baas rapporteer. Hy moet verduidelik as daar fout gekom het, as een byvoorbeeld weggeraak het. En wee die herder as die skape se baas agterkom hy het hulle verwaarloos.

Die mense sê jy besluit nie om ’n herder te word nie; jy word as ’n herder gebore. Dit is in jou bloed, hierdie herderskap. Jy wy jou lewe daaraan. Jy weet maar te goed dat die eise van alle kante af hoog is, dat rekenskap van jou gevra word.

Maar soggens staan jy op, neem jou stok en jou staf en lei jou trop tot by die groen weivelde en die water waar daar vrede is. Wanneer die nag kom, slaap jy met jou een oog oop en die wapens gereed.

Herders raak nogal verknog aan die troppie wat hulle moet op­pas, en hulle verwonder hulle gereeld daaroor dat die eienaar hulle met dié werk vertrou. Want almal weet dat hy, die baas, hartstogtelik lief is vir sy skape. Dat hy self verantwoordelikheid vir hul welstand aanvaar. Hy kan dit nie verdra dat sy skape onder ’n vertroueling se versuim moet ly nie.

Daarom oordeel hy so skerp oor ’n herder as dié droogmaak. Dan maak hy ’n ander plan …

U, Here, is my Herder. En U vertrou my met u troppie. Ag, Here, leer my hoe om te maak!

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.