Boodskap vir Vandag

Search
Close this search box.
Search

Vleispotte-van-vergeet

Lees Eksodus 16:2-4.

“As ons maar liewer in Egipte omgekom het … by die vleispotte” (v 3).

Kla sou hulle kla, die Israeliete op trek deur die woestyn. Die mur­murerende Israeliete, soos ons kleintyd geleer is.

Dié nimmereindigende gekla was altyd die voorspel tot ’n in­gryping deur die Here. Iets wat hulle ’n tyd lank tevrede sou hou. Hierdie keer was dit die manna en die kwartels.

Maar die vreemdste van hierdie keer se luidrugtige ontevre­denheid was die wens om terug te gaan Egipte toe. Dit was wel ’n plek van slawerny, maar dit was ook die plek van die vleispotte. Daar het hulle hulle byna doodgewerk en is hulle dikwels amper doodgeslaan, maar daar was glo ’n oorvloed kos, potte vol.

Ons sal eerder doodgaan van ellende as van honger, het hulle gesê. Jy kan nie vryheid eet nie. Vooruitsigte op ’n beter toekoms maak nie die maag vol nie. ’n Mens kan nie op brood-vir-die-lewe oorleef nie …

Toe gryp die Here in en belowe kos – maar net genoeg vir elke dag. Môre sal vir môre se kos sorg. Só, sê die Here, só sal Ek hulle toets. Sal Ek sien of hulle onthou waar alle goeie gawes vandaan kom. Hulle het dan so gou vergeet hoe swaar hulle in Egipte gekry het. Hulle praat glad van die goeie ou dae daar.

Hierdie ou storie herhaal hom elke dag in moderne mense se lewe. Sulke mense, mense soos ons, aanvaar sonder meer dat die sogenaamde goeie ou dae se sogenaamde vleispotte ons toegekom het. Dat dit die gevolg van ons eie verdienste was.

Kla sal ons deesdae kla, die witbrood onder elke arm. Sien, egosentrisme – ag, sommer plein vraatsigheid – laat ons so mak­lik vergeet!

Here, Bakker van my lewensbrood, U voed my, U vul my.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.