Boodskap vir Vandag

Search
Close this search box.
Search

Wie mag?

Lees Psalm 15.

Wie het die reg om in u woonplek te kom, Here? Wie mag op u heilige berg vertoef? (v 1).

Ja, wié? Want die psalmdigter stel die dwarslat baie hoog: die on­berispelikes, die waarheidpraters, die liefhebbers van die naaste. Hulle wat nie vatbaar vir omkopery is nie, wie se woord hul eer is. Dié wat nie omgee om skade te ly nie, solank hulle maar net die regte ding doen.

Hoog, ja, hemelhoog. En ek kom nie daarby nie, nie eens naas­tenby nie. Ek slaag trouens nie een van daardie toetse nie.

Dit het sin om te dink dat net spesiale mense God se ligkring kan deel. Dit is immers die plek waar die engele sit en sonder ophou uitroep: “Heilig, heilig, heilig …” (Op 4:8). Dáár is sekerlik nie plek vir kansvatters soos ek nie. Dit is nie my plek nie.

Wat doen ek nou? Want ek kan nie sonder Hom nie, ten spyte van my groot mond, my gewaande onafhanklikheid van God en sy gebod. Hoe moet ek maak?

Dalk moet ek niks doen nie. Terwyl my onheiligheid my elke dag in die gesig staar, moet ek dalk bloot vir Jesus glo wat her­haaldelik gewys het dat Hy onheiliges in die oë kyk. Vir Saggeus, vir die vrou by die put, die vrou wat sy voete salf, die vrou wat op owerspel betrap is. En omtrent in elke verhaal waar Hy na sy dissipels kyk.

Tot vandag toe is dit só met mense soos ek. Al wat dit beteken vir mense wat nie na God toe mag gaan nie, is dat hulle maar kan glo Jesus het namens hulle na God toe gegaan. Hý mag maar, en Hy het.

Wat ’n Vriend het ons in U, Here Jesus! U wat in ons plek kom staan het.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.