Boodskap vir Vandag

Search
Close this search box.
Search

Opdraand

Lees Markus 8:34-38.

“As iemand agter My aan wil kom, moet hy homself verloën, sy kruis dra en My volg” (v 34).

Nou is daar net een koers: Jesus se reis hier op aarde staan einde se kant toe. Die skares is weg en nou is dit net Hy en sy naaste volgelinge. Hy berei hulle voor op die dag wanneer alles op ’n heuwel buite Jerusalem gaan eindig. En op ’n definitiewe manier weer gaan begin.

Hier verklaar Hy aan hulle die geheim van dissipelskap: Om agter My aan te kom, sê Hy, beteken dat jy ophou om jou eie kop te volg. Dat jy ophou jammer wees vir jouself. Want dit is nie ’n maklike pad nie, en jy kan dit nie verder kompliseer deur onop­houdelik met jou eie veronderstellings en voorbehoude en spoke uit die verlede te stoei nie.

Jy moet die reis so lig moontlik aanpak en daarom so gou moont­lik van jou ego ontslae raak. En van jou dun vel, want die kruis wat jy noodwendig saamdra, sal sonder twyfel skuur en skaaf en ent-ent selfs die bloed laat loop.

Dit is die hele pad opdraand tot by Golgota.

Daarna gaan dit nie veel beter nie. Inteendeel. Christus se vol­gelinge het dit nooit maklik nie. Hulle is in ’n durende geveg met hulleself gewikkel, veral oor die aanloklike moontlikhede wat die breër paaie hulle bied. Hulle het probleme met kleinserigheid, met selfsug, met die behoefte aan erkenning en die sug na beloning.

Hulle raak nooit van die kruis ontslae wat hulle in Jesus se Naam dra nie. Hulle voel dit rem hulle af en hou hulle terug. Hulle sukkel lewenslank om te verstaan dat dit ’n ononderhandelbare kenmerk van dissipelskap is en ’n onmeetlik groot voorreg.

U ken alle lewenspaaie, al die hoogtes, dieptes, draaie. Kom en vat my hand!

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.