Boodskap vir Vandag

Search
Close this search box.
Search

Die Here hoor

Lees Psalm 116:1-9.

Hy het na my geluister toe ek Hom aangeroep het (v 2).

Te midde van al die geleerde uitsprake oor God en sy gebod en al die slimmighede wat dese en gene oor Hom verkondig, is daar maar een enkelvoudige boodskap wat sy kinders wil hoor. En hulle sal waarskynlik nooit genoeg daarvan kry nie. Dít: Die Here hoor my as ek roep.

Die talle Bybelverse wat oor hierdie verwagting handel, is dik onderstreep en voos gelees. Predikers sal goed vaar as hulle dié versekering gereeld laat opklink. Hulle het ook nie ’n verskei­denheid maniere nodig om dit te verkondig nie. Die behoefte is eenvoudig: Hoor die Here as ek Hom aanroep? Die antwoord is ’n ondubbelsinnige ja.

Daar is wel nog ’n kwessie: die bidder se motief. Hy, die Here God wat die harte deurgrond (Rom 8:27), weet wat agter ons gebede lê, al is dit hoe goed verskuil. Daarom moet ons nie veront­waardig wees as sake waaroor ons so vurig gebid het, nie uitwerk soos ons dit wou hê nie. Julle kry nie wat julle bid nie, sê Jakobus, omdat julle dit waarvoor julle so plegtig vra, wil misbruik (Jak 4:3). Die Hartekenner weet dit.

Hierdie bedenklike houding is ver van Psalm 116 se bidder verwyder. Hý ken net nood, doodsvrees, benoudheid. Sy gebed was bloot ’n magtelose kreet: Here, help!

Daarom sy onverdunde lof aan die Here. Nee, hy is nie ewe skielik toegegooi met allerlei seëninge nie. En, nee, sy status in ander mense se oë is nie eensklaps herstel nie.

Dit is ook nie waarvoor hy gebid het nie. Hy het bloot gevra: Help my! En God het gehoor. Halleluja!

Dit is ook my troos, Here. En ’n les wat ek moet leer, Kenner van my hart.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.