Boodskap vir Vandag

Search
Close this search box.
Search

Vrese

Lees Markus 9:30-32.

“Die Seun van die mens word in die hande van mense oorgelewer, en hulle sal Hom doodmaak” (v 31).

Maar hulle het hierdie uitspraak van Jesus nie verstaan nie, sê Markus, en hulle het Hom nie daaroor uitgevra nie. Hulle was te bang. Al was dit die tweede keer dat Hy dit vir hulle gesê het.

Dalk was hulle bang om die fout te maak wat Petrus daardie eerste keer gemaak het toe Jesus hom “Satan” (Mark 8:33) genoem het en gesê het hy moet trap. Dalk was dit die groot woorde, die “oorlewer, doodmaak”, wat hulle laat swyg het. Dalk bloot die vrees vir die onbekende en die selfs groter vrees dat wat vir hulle voorlê, niks goeds beloof nie.

Gelowiges was nog nooit goed met die onheilspellende voor­uitsig dat hul volgelingskap hulle gaan kós nie. Dat hulle iewers sal moet betaal vir hul waagmoed om Jesus as Leermeester te hê. Dalk het hulle toe nooit die koste hiervan bereken soos Jesus hulle vooraf aangesê het om te doen nie (Luk 14:28-29).

Noudat dit lyk asof die eise te veel gaan wees, wonder hulle of dit toe wel so ’n goeie besluit was.

Dissipelskap is duur! het ander dissipels ons al herhaaldelik gewaarsku. Mense wat die hoë prys betaal het vir hul keuse om die Seun van die mens te volg, het martelare geword, bloedgetuies. Dít is genoeg om enigeen wat volgelingskap oorweeg, bang te maak.

Dit sal hulle, ons, wel loon om weer goed na Jesus se woorde hier te luister. Daar sal ook ’n opstanding wees, het Hy mos gesê. Die laaste woord behoort aan God, en die krag daaragter verdryf die laaste vyand én al ons ergste vrese.

U het opgestaan, Here Jesus. Help my tog ook orent, asseblief.

Barend Vos

 

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.