Boodskap vir Vandag

Search
Close this search box.
Search

Aan dieselfde kant

Lees Markus 9:38-41.

“Wie nie téén ons is nie, is vir ons” (v 40).

Gelowiges is berug daarvoor dat hulle onderling skerp van me­kaar kan verskil. En, nee, dit gaan nie noodwendig oor ’n dispuut rakende kleredrag of kerkmusiek of die prys van pannekoek op die kerkbasaar nie, maar veral oor sake wat die evangelie raak. Of dan, die evangelie soos óns dit verstaan, in teenstelling met hoe húlle dit verstaan.

Gelowiges het deur die eeue dan ook die gebruik gevestig dat as dinge verskillend vertolk word, die weë sal skei: Óf ék gaan stig ’n nuwe kerk óf jý doen dit. Maar vir ons met ons uiteenlopende sienings is daar nie plek in dieselfde kerk nie.

Soms het sulke skeurings minder dramatiese gevolge: Daar word voortaan by ’n buurgemeente aanbid, of daar word doodge­woon nie meer aanbid nie, in elk geval nie saam met húlle nie …

Jesus se dissipels het hierdie ongemaklikheid op hul eie manier probeer hanteer. Hul redenasie is nie vir ons vreemd nie: Dáárdie mense is nie deel van óns groepie nie, en daarom het ons hulle probeer keer om te doen wat hulle doen. Of bekeer om te doen soos ons dit doen.

Jesus se reaksie kom vir sommige as ’n ontnugtering. Ons is aan dieselfde kant, sê Hy. Hulle doen die goeie dinge wat ons ook doen, al is dit dalk nie op dieselfde manier as ons nie. Ons hoef nie beheer oor hulle te hê of bevel oor hulle te voer nie. Hulle doen God se werk, en Hy is in beheer. Soos ons, gehoorsaam hulle God se bevel. Hy sal oor hulle oordeel, soos Hy oor ons sal oordeel.

Here, neem weg ons begeerte om ander mense se godsdiensbeoefening te beoordeel. Leer ons weer en weer hoe om lief te hê, bo alles.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.