Boodskap vir Vandag

Search
Close this search box.
Search

Is God só?

Lees Job 1:1; 2:1-10.

“Bly jy nog steeds vroom? Vervloek God … !” (2:9).

Job en sy storie het ons gereeld in ’n hoek, en ons spartel om daaruit te kom. Kyk maar: Hoe gemaklik is jy, gelowige mens wat hier lees, met ’n vergadering waar die hemelwesens voor die Here kom staan, en dan kom sluit die Satan hom ook daar aan. Verbeel jou – hý!

As dit maar ál was … Daar volg toe boonop ’n debat tussen die Here en Satan oor Job se vroomheid en opregtheid, al dan nie. Met die Here wat ten einde laaste toegee: Maak met hom wat jy wil. Spaar net sy lewe.

Goeie genade! Vloek hierdie storie nie teen omtrent alles wat ons van die Here weet nie? Hoe kom ’n gelowige leser uit hierdie ene? Hoe verweer jy jou teen die siniese kommentaar van anders­denkendes wat smalend vra: Is dit soos julle God met julle maak?

Wat van medegelowiges wie se oë groot rek en wat vir jou vra: En nou? Is God dan so?

Miskien moet ons liefs verder lees, die storie klaar lees. Nie saam met Job se vrou begin skel nie. Net nie in dieselfde strik trap as soveel ander wat hierdie tiental verse lees en dink nóú weet hulle alles van God nie.

Ons weet immers genoeg om te weet Hy pas nie in ’n halwe Bybelhoofstuk in ’n interessante literêre genre in nie. Hy is nie ’n storieboekskurk nie. Hy is God. Sy kinders, ook Job-met-die­-swere, ken Hom as die Een aan wie se liefde daar geen einde is nie.

Kom ons hou eers ons mond. Kom ons luister die storie klaar.

Ons vinnige woorde en kinderagtige gedagtes oor U maak ons uiteindelik skaam, Here. Leer ons om beter te luister.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.