Boodskap vir Vandag

Search
Close this search box.
Search

Ek is jammer

Lees Job 38:34–39:2.

“Kan jy …?” (38:34).

Die res van die Goddelike vraesessie in hierdie hoofstuk bestaan uit dié soort vrae, waarmee Job behoorlik op sy plek gesit word. “Kan jy …?” word ’n herhalende refrein.

En, soos maar met hierdie soort vrae, word geen antwoord ver­wag nie. Daar ís trouens geen antwoord anders as “ek is jammer, Here” nie.

Ek is jammer oor my selfvoldane eise. Ek is jammer oor my voortvarende aannames. Ek is jammer dat ek U beskuldig het. Ek is jammer dat ek my so vrymoedig uitgespreek het oor dinge waarvan ek niks weet nie.

Ek is jammer oor my vriende. Ek is jammer dat ek my deur hulle laat mislei het toe hulle beterweterige kommentaar op U en u doen en late gelewer het. Ek is jammer dat ek myself so jammer gekry het dat ek nie u eer beskerm het toe hulle dit aangetas het nie. Ek is jammer dat ek so bitter min van U weet dat ek nie eens met ’n antwoord vorendag kon kom toe hulle gelaster het nie.

Nou is ek jammer dat U soveel tyd aan my moet afstaan om my my plek in u skepping te laat begryp. Ek is jammer dat U my soos ’n kind op ’n aanskouingsles moet neem om my vergissings aan my uit te wys. Ek is jammer dat my begrip so beperk en my insig so bejammerenswaardig is dat ek sukkel om selfs ’n greintjie van u almag na behore te begryp.

Ek is jammer, Here, dat u eindelose liefde my steeds verras, en ek is jammer dat u genadige goedheid my ná al die jare steeds sprakeloos laat.

Vergewe my, liewe Here! Vergewe my.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.