Boodskap vir Vandag

Search
Close this search box.
Search

Komplimente, keuses

Lees Markus 12:28-34.

“Pragtig, Meneer!” sê die skrifgeleerde vir Hom. “Dit is waar wat u gesê het: ‘Die Here is die enigste God’” (v 32).

Dit het maar min gebeur dat die skrifgeleerdes Jesus gekomplimen­teer het. Is hiérdie geleentheid nie omtrent die enigste waarvan ons weet nie?

Hoe ook al. Die gesprek begin soos sulke gesprekke maar begin het – die skrifgeleerde hoor hoe Jesus die ander se vrae beantwoord en hy reken om darem ook sy stuiwer in die armbeurs te gooi. Sy vraag oor die heel grootste gebod was egter nie so onskuldig nie. Hy het goed geweet dat daar nie onderskeid tussen die gebooie gemaak mag word nie, en daarom luister hy fyn.

Toe Jesus hom met aanhalings uit Deuteronomium en Levitikus antwoord, klap hy egter hande. “Pragtig, Meneer!”

Ek sou so reken, genugtig! Hy kon maar sy applous vir homself gehou het, en begin het om sy eie “pragtige” belydenis uit te leef. Kyk, om die voorrang van die liefdesgebod bo allerlei seremoniële offers te erken, en om dit netjies te bewoord, beteken nog nie dat jy dit nakom nie.

Maar daar is hoop. Ná sy belydenis bemoedig Jesus hom: Jy ver­staan baie van God se koninkryk.

Hierin is báie meer as ’n kompliment geleë; ten minste geen moontlikheid van valsheid of heuning-om-die-mond nie. Dit is die hartlike uitnodiging van die koninkryk se Koning: Kom na My toe!

Markus sê niemand het dit hierna met nóg ’n vraag gewaag nie. Sy woorde – of dit nou ’n antwoord of ’n vraag of ’n storie is wat Hy vertel – konfronteer jou altyd met ’n keuse. En dit maak jou stil.

Vergewe my asseblief my versuim, Here! My maklike woorde en trae dade.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.