Boodskap vir Vandag

Search
Close this search box.
Search

Net een keer

Lees Hebreërs 9:24-28.

Maar nou het Hy net een keer … verskyn om deur sy offer die sonde weg te neem (v 26).

Die Hebreërskrywer keer gereeld na hierdie waarheid terug: Chris­tus het een keer gely, Hy het Homself een maal geoffer. Dit alles was eens en vir altyd.

Natuurlik probeer die skrywer die teenstelling skets tussen wat Christus as ewige Hoëpriester gedoen het en wat die Jode, die Hebreërs, se hoëpriesters doen. Een maal teenoor herhaaldelik. Eens en vir altyd versus keer op keer.

Hy kan sekerlik ook sug: Hoeveel keer moet ek dit nóg sê en op hoeveel verskillende maniere, voordat mense wat so in hul ou gebruike vasgevang is dit verstaan? Wanneer sal die Jesusvolge­linge eendag van die ou denkpatrone afsien?

Dit was twee duisend jaar gelede; hy skryf vir die eerste-eeuse Christene. Sedertdien het baie gelowiges se opvattings en begrip klaarblyklik bloedweinig verander. Steeds heers daar by sommige die grootste moontlike onsekerheid oor wat Christus alles vir hulle gedoen het. Was dit genoeg? vra hulle. Dit kan tog nie eens en vir altyd wees nie! sug hulle. Daar móét iets wees wat ek ook moet doen! Wys my watter offer ek moet bring! roep hulle uit.

Hoe jammer is dit nie. Hoe tragies dat mense wat met die grootste moontlike vreugde behoort te lewe, soveel onsekerheid beleef. Dat hulle só oor ’n uitgemaakte saak wroeg. Kan hulle nie lees nie? Glo hulle nie die Hebreërskrywer nie?

Wat is dit wat hulle verwar? Wie het hulle bang gepraat? Hoe sal God se oordeel lyk oor mense wat hul eie reëls vir sy koninkryk opgestel en ander mense daarmee verpes het?

U het my sondeskuld weggeneem. U het met u lewe betaal. Ek glo U, Here!

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.